رمضان بتاعنا تاه في الزحمة ؟؟؟

جرب تنزل الشارع كده.. حاول تدوّر على عيال صغيرة ماسكة جردل نشا وبتقصقص ورق علشان زينة رمضان.. ولا عيال تانية بتلف على البيوت بتجمع جنيه من كل شقة علشان لمبات رمضان.. ولا بياع معاه فوانيس صفيح إزازها ألوانه تحفة.. ولا مكان فيه ريحة ياميش وتمر هندي وكركديه..

أنا هاقول لك هتشوف إيه بدل ده...

لو أسعدك الحظ ولقيت عيال بتعلق زينة رمضان أصلا، غالبا ما هتلاقيها زينة بلاستيك جاهزة وماسخة.. وبالنسبة للفوانيس فبنشكر الصين اللي متابعانا في كل مناسباتنا ولحقت تعمل لنا فانوس كرومبو (البلاستيك برضه).. أما بالنسبة للياميش فهتلاقيه موجود، بس بتتباع جنبه المكسرات الصيني والمقرمشات الإندونيسي من باب المشاركة وتوحيد الشعوب.. أما الكركديه، فبدل ما تنقع وتغلي وتسقع.. عندك ميرندا كركديه!

يمكن ناس كتير مش هتشوف مشكلة في ده كله، وهتشوف إن ده التطور الطبيعي للحاجة الساقعة.. وإيه يعني إن الدنيا تبقى صيني وبلاستيك في بلاستيك.. ما هو البلاستيك برضه بطل العصر (مع تحيات الهلال والنجمة).. والصين مالية بيوتنا بحاجات صغيرة ما لهاش لازمة (مع تحيات محلات اتنين ونص)..

لكن الموضوع لا يخص البلاستيك والصين (اللي بالمناسبة عاملة قناة جديدة موجهة للعرب بتتكلم عن تاريخ الصين وفنون الصين إلخ.. قال يعني مش كفاية اللي إحنا فيه)، بقدر ما يخص عاداتنا وتقاليدنا وموروثنا الثقافي..

لما تتدخل دولة زي الصين مثلا (مع كامل احترامي) في تشكيل وجداننا ومزاجنا الرمضاني.. مع العلم بأن رمضان وقت خاص جدا في السنة.. وله طعم مختلف في كل مكان في العالم الإسلامي.. ولما يحصل إحلال لحاجات حلوة وتقليدية وأصلية بمسوخ وأشباه أشياء.. يبقى أكيد عندنا حاجة غلط.. وهو ده الدور اللي بتلعبه علينا العولمة.. العولمة اللي معناها إن العالم بقى قرية صغيرة.. يعني كله مفتوح على بعضه يا معلم.. واللي عنده الثقافة الأقوى اللي بيدعمها طبعا الاقتصاد الأقوى.. يبقى هو الكسبان.. وده تقريبا نفس المعنى اللي قاله الزعيم في "عمارة يعقوبيان" لما صرخ بعلو صوته في وسط البلد وقال: "إحنا في زمن المسخ"..

عارفين يعني إيه حاجة ماسخة؟ يعني زي علبة شوكولاته شكلها رائع تيجي تفتحها تلاقي جواها خيارة! يعني زي "بوجي وطمطم" من غير رحمي.. وفوازير من غير نيللي أو شريهان.. يعني شكل بلا مضمون.. بلا طعم.. بلا خصوصية..

مشكلة حقيقية لو رمضان بتاعنا تاه في الزحمة وبقى خيارة!

بغضّ النظر عن النزعة الاستهلاكية الجنونية اللي نزلت على الناس قبل رمضان، والشراء الهيستيري وتفريغ كل المحلات من كل المؤن كأننا داخلين على مجاعة مثلا أو وباء.. وبغض النظر عن ماسورة المسلسلات اللي بتنفجر في رمضان فقط، وتخلينا طول السنة نفضل نتفرج على إعادات! (عينك يا حمادة والتليفزيون)... وبغض النظر كمان عن تحويل كل أفكارنا في الشهر الفضيل إلى سؤالين وجوديين: "المدفع هيضرب إمتى؟" و"يا ترى هاقدر أتابع 6 مسلسلات مع بعض إزاي؟"

نتمنى لكم الاستمتاع بجمال رمضان وروحانياته وصلواته وصيامه..

سلِّ صيامك:

وانت طيب يا كبير وشكرا على التشجيع ده

عندك حق والله يا محمد رمضان دلوقتى عند اغلب الناس بقى مفهومه غلط هو استهلاك كمية كبيرة جدا من الاكل والشرب هو متابعة مسلسلات وفوازير رمضان هو الاطفال يضيعوا فلوسهم فى الصوايخ والبمب هو العزومات والافراط فى الاكل ونسيوا ان رمضان شهر عبادة شهر عتق من النار شهر القران واخيرا اللهم بلغنا رمضان واعنا على ذكرك وشكرك وحسن عبادتك * وتسلم ايدك محمد ميرسى على مجهودك يارب دائما فى تفوق

تقبل مرورى

تسلم ايدك يا كابو ايوه كده عايزين منك مواضيع كتير بس لسه على فكره في ناس بتجمع فلوس عشان لمض رمضان وفي ناس بتقصقص ومنهم اختي لما بهدلت الشقه ههههههههههههههههههههههههههههههه
يلا كل سنه وانت طيب

ربنا يخليكو يا جماعه على الردود الجميله الدى ويارب يخليك يا تامر على كلامك الحلو ده وربنا يتقبل منا ومنك ومن المسلمين أجمعين يا سلمى وربنا يخليلك أختك يا منى وتبهدلك الشقه وانتى ترتبى وراها

ههههههههههههههههههههه ماهي بتبهدل يا خويا تسلم يا كابو موضوعك جميل ويارب معانا دايما

ميرسي يا شبح ربنا يخليك يا قمر

تسلم ايدك يا كابو والله موضوع جميل جدا بس فى دلوقتى بيلموا للمد والزينة